ڈپٹی کمشنر بھکر وقاص رشید نے کہا ہے کہ چاروں تحصیلوں کے سپیشل ایجوکیشن سینٹرز کیلئے سپیشل ایجوکیشن ڈپارٹمنٹ پنجاب کی پالیسی کیمطابق 26 ایچ ٹی ایز تعینات کردئے گئے ہیں

ڈپٹی کمشنر بھکر وقاص رشید نے کہا ہے کہ چاروں تحصیلوں کے سپیشل ایجوکیشن سینٹرز کیلئے سپیشل ایجوکیشن ڈپارٹمنٹ پنجاب کی پالیسی کیمطابق 26 ایچ ٹی ایز تعینات کردئے گئے ہیں جس سے ضلع میں سپیشل ایجوکیشن کے اداروں میں ٹیچنگ سٹاف کی کمی پوری ہوگئی ہے ۔انہوںنے یہ بات بھکر جاب بیورو کے زیر اہتمام منعقدہ تقریب میں تحصیل بھکر اور دریا خان کے بارہ ایچ ٹی ایز کو اسناد تقرر دینے کے موقع پر خطاب کرتے ہوئے کہی ۔تقریب میں اے ڈی سی آر عابد حسین بھٹی ،اے ڈی سی جی خالدمسعود فروکہ ،سپیشل ایجوکیشن سینٹرز کے فوکل پرسن عرفان عارف ،انچارج بھکرجاب بیوروعدنان جمیل ،محکمہ تعلیم کے افسران اور سپیشل ایجوکیشن سینٹرز کے انتظامی سربراہان بھی موجودتھے ۔تقریب میں بتایا گیاکہ تحصیل منکیرہ اور کلورکوٹ کے سپیشل ایجوکیشن سینٹرز کیلئے تعینات کئے گئے 14 ایچ ٹی ایز کو بھی اسنادتقرر جلد فراہم کی جائیں گی ۔ڈپٹی کمشنر وقاص رشید نے کہاکہ ایچ ٹی ایز کی تعیناتی سے سپیشل ایجوکیشن سینٹرز کے معیار تدریس میں نمایاں بہتری آئے گی اور ان سینٹرز میں زیر تعلیم خصوصی بچوں کو حصول تعلیم کیلئے موافق ماحول میسر آئے گا ۔انہوںنے ایچ ٹی ایز کو تاکیدکی کہ وہ متعلقہ سینٹرز میں اپنے آپ کو اچھا اضافہ ثابت کریں اور خصوصی بچوں کی تدریس کیلئے سونپی گئی ذمہ داریوں کی احسن تکمیل یقینی بنائیں